« Breizh, ma identelezh »

Ganet eo Charles Kergaravat er Stadoù-Unanet, gant kerent breton, ha klask a ra kreñvaat al liammoù etre hor bro hag hini an Eontr Sam.

Lavarit deomp piv oc’h, mar plij ?
Er Stadoù-Unanet on ganet. Ma zud a zo bretoned a oa deuet d’ar vro er bloavezhioù 60, evel kalz gallaoued-all. Amerikan ha breizhad on. Pa oan yaouank e tremenen tout ma hañvezhioù en Elliant, ha kemer a raen perzh e gouelioù-meur Kerne da skouer. Ul liamm kreñv em eus bet a-viskoazh gant Breizh. Ma identelezh eo. Evel-se em eus savet ar gevredigezh BZH New-York. Met pelloc’h eget New-York em eus c’hoant da sellet bremañ.

Peseurt tresoù heñvel a zo gant ar Stadoù-Unanet ha Breizh ?
Ur bern a zo, en ekonomiezh da skouer. Kalz embregerezhioù a labour er Stadoù-Unanet. Sevel a ra ar strollad Bolloré batirioù en Erge-Vras rak krouet o deus ur servij rannañ otoioù tredan 100 % e Indianapolis (Blueindy). Armor Lux en deus ur stal e New-York ha gwerzhañ a ra e froduoù e meur a stal. Meur a skouer evel-se a zo : deuet e oa degadoù a embregerezhioù breizhat evit saloñs elektronek Las Vegas. C’hoant em eus da lakaat an traoù-se war wel, dre ma lec’hienn internet, war ar rouedadoù sokial… 
Istorioù liammet hon eus, e-kerz an daou vrezel bed da skouer, degouezhet e oa kalz a soudarded amerikan e porzh Brest. War un dachenn sevenadurel e c’heller menegiñ ar sonerezh jazz hag a zo erruet en Europa dre v/Breizh da gentañ.

Perak ho peus krouet Breizh Amerika ?
Krouet em eus ar gevredigezh bloaz zo evit brudañ al liammoù etre ar Stadoù-Unanet ha Breizh evit ma c’hellfe an amerikaned dizoloiñ hon sevenadur hag hor rannvro.
Meur a raktres a zo ganeomp gant sonadegoù er Stadoù-Unanet evit gouel Breizh. D’ar 17 a viz Meurzh e vo un dibunadeg vras evit gouel Sant Padrig war ar 5vet bali e New-York. Pedet hon eus ez-ofisiel Bagad Bro Landerne ha Kelc’h Keltiek Eskell an Elorn. Emaomp o vont ivez da aozañ ur “Business Breakfast” gant dilennidi ha penn-embregerezhioù breizhat ha tud a aferioù eus New-York.

http://www.lecourrier-leprogres.fr/2015/03/08/«-breizh-ma-identelezh-»/